برطانوی انجینئرنے خود کا ہوائی جہاز بنا لیا
لندن(نیاٹائم)برطانیہ کے ایک انجینئر نےاپنے پائیں باغ کو گیراج میں بدلتے ہوئے صرف اٹھارہ ماہ میں اپنے خاندان کے لیے ایک ہوائی جہاز بنایا ہے جو انکی عزم وہمت کو ظاہر کرتا ہے۔
چندسال پہلے اشوک الیسرل تاما رکشن کی اہلیہ نے سالگرہ پر انہیں ایک گفٹ دیا جس کے تحت وہ ماہر کی نگرانی میں تیس منٹ تک ایک چھوٹا جہاز اڑاسکتے تھے۔ لیکن اس تجربے نے ان کی زندگی تبدیل کردی اور وہ اپنے پرسنل جہاز کا خواب دیکھنے لگے۔پھر 2019 میں انہوں نے پرواز کا لائسنس لیکر کچھ پروازیں کیں۔ تاہم دو نشستی طیارہ ان کے اہل خانہ کے لیے کافی نہ تھا تو انہوں نے اپنا طیارہ بنانے کی ٹھان لی۔انہوں نے ڈیزائن کے لیے ساؤتھ افریقہ کی کمپنی سلِنگ ایئرکرافٹ کا4نشستی طیارہ اڑاکر دیکھا اور اس کی کٹ منگوائی کیونکہ برطانیہ میں پورا لاک ڈاؤن تھا۔ انہوں نے برطانوی ایوی ایشن ایکسپرٹ کی نگرانی میں گھر کے باغ میں ایک گیراج بنا کر کام کی شروعات کی۔
اس سفر میں انکی بیٹیوں نے بھی مدد کی اور انہوں نے 7.175 میٹر لمبااور 2.45 اونچے طیارے پر کام شروع کیا۔ 2020 کے موسمِ گرما میں انہوں نے طیارے کے بازو اور دم بنالیے تھے۔ اس کے بعد مزید ڈھانچے پر کام کا آغاز کیا۔ اس دوران برطانوی فضائی ایجنسی کے ایکسپرٹ اس کا جائزہ لیتے رہے۔یوں ڈیڑھ سال کی محنت اور ماہرین کی بارہ مرتبہ جانچ پڑتال کے بعد ایک لائٹ ایئرکرافٹ تیار ہوا۔ اشوک نے جہاز کو بیٹی کے نام پر رکھا اور جنوری 2022 میں اس کی آزمائشی پرواز کی جو بیس منٹ پر محیط تھی۔ پھر مئی 2022 میں اس کو باقاعدہ فٹنس پرمٹ مل گیا۔اب اشوک اپنی فیملی کے ساتھ یورپ جانے کا ارادہ رکھتے ہیں۔
