الیکٹرک گاڑیوں کیلئے انقلابی ٹیکنالوجی متعارف
لاہور (نیا ٹائم ویب ڈیسک) الیکٹرک گاڑیوں کیلئے انقلابی ٹیکنالوجی متعارف کروائے جانے کا امکان ، الیکٹرک گاڑیوں کیلئے امریکی خلائی ادارے ناسا انٹرنیشنل سپیس اسٹیشن میں استعمال کے لیے تیار کی جانے والی ٹیکنالوجی الیکٹرک گاڑیوں کو بھی چارج کر سکے گی ۔
ناسا انٹرنیشنل سپیس اسٹیشن میں تیار ہونے والی ٹیکنالوجی بہت تیزی کے ساتھ الیکٹرک گاڑیوں کو چارج کرنے کی صلاحیت کی حامل ہے۔
ناسا نے ایک بلاگ پوسٹ میں بتایا ہے کہ الیکٹرک گاڑیوں کی چارجنگ کیلئے متعارف کروائی جانے والی یہ پیچیدہ کولنگ تکنیک خلا میں مخصوص برقی نظام کا درجہ حرارت مناسب رکھنے میں مدد فراہم کرتی ہے۔ اس ٹیکنالوجی کے ذریعے الیکٹرک گاڑیوں کو مارکیٹ میں دستیاب دیگر چارجنگ ٹیکنالوجیز کے مقابلے میں 5 گنا زیادہ کرنٹ فراہم کیا جاسکتا ہے اور انہیں جلد چارج کیا جا سکے گا ۔
ناسا کے بلاگ کے مطابق زیادہ کرنٹ کے باوجود یہ ٹیکنالوجی تاروں کو ٹھنڈا رکھتی ہے جس سے پرزہ جات گرم نہیں ہوتے ۔
ناسا کے مطابق اس نظام کو چاند، مریخ اور دیگر خلائی مشنز میں موجود جوہری پاور سسٹمز کی فراہمی کے لیے تیار کیا گیا تھا ، اگرچہ اس وقت کچھ ممالک میں الیکٹرک گاڑیوں کو 20 منٹ سے کم وقت میں چارج کرنے کا سسٹم موجود ہے تاہم ناسا کا دعویٰ ہے کہ اس کی تیار کردہ ٹیکنالوجی کے ذریعے گاڑیوں کو محض 5 منٹ میں چارج کیا جا سکے گا ۔
امریکی ادارے کے مطابق اس ٹیکنالوجی کے استعمال سے کسی بھی گاڑی کو چارج کرنے کا وقت نمایاں طور پر کم ہوجائے گا اور اس سے دنیا بھر میں الیکٹرک گاڑیوں کو زیاہ پذیرائی حاصل ہو گی ۔
