موجودہ حکمرانوں سے خیر کی کوئی توقع نہیں، چودھری پرویز الہٰی
لاہور(نیاٹائم)سپیکر چوہدری پرویز الہی سے مسلم لیگ ق راولپنڈی کے صدرزبیر خان کی قیادت میں وفد نے ملاقات کی ہے۔ جس میں سیاسی صورتحال اور ضمنی انتخابات بارے بات چیت کی گئی ہے۔
راولپنڈی کی قیادت سے ملاقات میں مسلم لیگ ق نے ضمنی انتخابات میں تحریک انصاف کے امیدواروں کی حمایت کر دی ہے،چودھری پرویزالہی نے کہا کہ پارٹی رہنما تحریک انصاف کے امیدواروں کی بھر پور مہم چلائیں۔ ،،تجربہ کاری ،،کا دعوی کرنے والے عوام کے سامنے بری طرح ایکسپوز ہوچکے ہیں،موجودہ حکمرانوں سے خیر کی کوئی توقع نہیں، اکانومی کو تباہ کر کے عوام کو مزید بری خبروں کیلئے تیار رہنے کا کہا جارہا ہے۔
سپیکر پنجاب اسمبلی چودھری پرویزالہی کا مزید کہنا تھا کہ یہ حکمران عوام کو ریلیف تو نہیں دے سکے روز نیا ٹیکس لگا دیا جاتا ہے۔ بجلی ، گیس پٹرولیم مصنوعات کی قیمتیں عام آدمی کی پہنچ سے دو ر ہوچکی ہیں، مہنگائی اور بجلی کی قیمتوں میں مسلسل اضافے کے باعث عوام میں حکمرانوں کے خلاف غصے کی لہر ہے،عوام ضمنی انتخاب میں نااہل حکمرانوں کے خلاف ووٹ کی طاقت سے فیصلہ دیں گے۔ سترہ جولائی کے الیکشن میں حکومت دھاندلی اور پولیس کے استعمال سے باز رہے ورنہ سخت عوامی ردعمل سامنے آئے گا۔ پنجاب کی جعلی غیر آئینی حکومت پولیس کا سیاسی مخالفین کے خلاف بدترین استعمال کر رہی ہے۔
