وزیر اعظم کی یوٹیلٹی سٹورز پر 5 چیزیں سستی کرنے کی ہدایت
اسلام آباد (نیا ٹائم)وزیر اعظم شہباز شریف نے یوٹیلٹی سٹورز پر عوام کو ریلیف دینے کیلئے پانچ بنیادی غذائی اشیاء کو کم قیمت میں فراہم کرنے کیلئے ہدایات جاری کر دیں ۔
وزیر اعظم شہباز شریف کی صدارت میں یوٹیلیٹی سٹورز کے حوالے سے اعلیٰ سطح کا اجلاس منعقد ہوا جس میں وفاقی وزراء مفتاح اسماعیل ، مخدوم مرتضی محمود اور متعلقہ اعلیٰ افسران شریک ہوئے ۔
اجلاس میں یوٹیلیٹی سٹورز پر دی جانے والی سبسڈی ، پسماندہ طبقے کو ٹارگٹڈ سبسی دینے ، یوٹیلٹی سٹورز کی ملک بھر میں توسیع اور خیبر پختونخوا میں وزیر اعظم کے وژن کے تحت سستے آٹے کی فراہمی پروگرام پر پیشرفت پر بھی تفصیلی آگاہی دی گئی ۔
اجلاس میں بتایا گیا کہ یوٹیلیٹی سٹورز کارپوریشن کے تحت ملک بھر میں اس وقت 3822 سٹورز براہ راست جبکہ 1380 فرنچائزز کے ذریعے چلایا جا رہا ہے جبکہ 30 جولائی تک بلوچستان ، سندھ ، کشمیر سمیت گلگت بلتستان اور پنجاب میں مزید 300 سٹورز قائم کئے جائیں گے ۔
اجلاس کو بتایا گیا کہ وزیر اعظم شہباز شریف کے ریلیف پیکیج کے تحت اب تک 11 کروڑ 30 لاکھ مستحق افراد مستفید ہو ئے ہیں جنہیں فی کلو آٹے پر 60 روپے ، چینی پر 21 روپے جبکہ گھی پر 250 روپے کا ریلیف دیا گیا ، دالوں اور چاول پر بھی 15-20 روپے فی کلو ٹارگٹڈ سبسڈی دی گئی ہے ۔ سبسڈی کا طریقہ کار ڈیجیٹل ہے جسے نادرا اور وزارت تخفیف غربت کے ڈیٹا سے منسلک کیا گیا ہے ۔
اجلاس میں بتایا گیا کہ صوبہ خیبر پختونخوا میں 942 یوٹیلٹی سٹورز پر سستے آٹے کی فراہمی یقینی بنائی جا رہی ے جبکہ وزیر اعظم شہباز شریف کی خصوصی ہدایت پر 1000 نئے سیل پوائنٹس بھی قائم کئے جا رہے ہیں جبکہ 200 موبائل سٹورز بھی بنائے جا رہے ہیں ۔
وزیر اعظم شہباز شریف نے غریب اور پسماندہ طبقے کیلئئے بڑے ریلیف پلان کے تحت 5 بنیادی ضروری اضایہ کو اگلے مال سال کیلئے کم نرخوں پر فراہم کرنے کا فیصلہ کیا ہے ۔
ذرائع کے مطابق مذکورہ سبسڈی یوٹیلیٹی سٹورز کے ذریعے پورے ملک میں غریب اور پسماندہ طبقے کو فراہم کی جائے گی ۔ سستی فراہم کی جانے والی اشیاء میں آٹا ، چینی ، گھی ، خوردنی تیل ، دالیں اور چاول شامل ہیں جوعوام کو بازار سے سستے داموں فراہم کئے جائیں گے ۔
وزیر اعظم نے یوٹیلیٹی سٹورز کے نیٹ ورک کو بھی توسیع دینے کی منظوری دیتے ہوئے کہا کہ کراچی میں یوٹیلیٹی سٹوز کی کم تعداد کسی صورت منظور نہیں ۔ انہوں نے کراچی میں یوٹیلیٹی سٹورز کی تعداد میں اضافے کا جامعہ منصوبہ دو ہفتے میں طلب کر لیا ۔
شہباز شرف نے کہا کہ پسماندہ طبقے کو اس وقت ریلیف کی زیادہ ضرورت ہے اور پسماندہ طبقے کے ریلیف کیلئے حکومت ہر قیمت ادا کرنے کو تیار ہے کیونکہ پسماندگہ طبقے کو اشیائے ضروریہ پر ریلیف دینا حکومت کی اولین ترجیح ہے ۔ شہباز شریف نے ہدایت کی سبسڈی کا نظام شفاف اور ڈیجیٹل بنایا جائے ، مختلف قسم کی سبسڈیز اکٹھی کر کے ایک جامع اور مربوط نظام قائم کیا جائے اور نظام کے تحت پسماندہ طبقے کو خصوصی طور پر ریلیف فراہم کیا جائے ۔
انہوں نے سبسڈی کے نظام میں اصلاحات کیلئے بھی وزیر خزانہ ، وزیر صنعت و پیداوار اور وزیر تخفیف غربت کو باہمی تعاون سے حکمت عملی تیار کرنے کی ہدایت کی ۔
