خدارا عامرلیاقت حسین کے بچوں پر رحم کریں، بشریٰ انصاری
کراچی(نیاٹائم)پاکستان شوبز کی سینئر اداکاراؤں بشریٰ انصاری اور ریشم نے عامر لیاقت حسین کی قبر کشائی کے فیصلے پر ردعمل کا اظہار کیا ہے۔
بشریٰ انصاری نے انسٹاگرام پر وڈیو پوسٹ کی جس میں انہوں نے درخواست کی خدارا مرحوم عامرلیاقت کے بچوں پر رحم کریں، انہیں مزید اذیت میں نہ ڈالیں،بشریٰ انصاری نے کہا کہ ہم سب کافی تکلیف میں ہیں، گزشتہ پورا ہفتہ ہم نے دکھ میں گزارا، عامر لیاقت کا یوں دنیا سے جانا ناصرف ان کے دوستوں بلکہ دشمنوں کو بھی دُکھی کرگیا، یوں تو ہر کسی کے جانے کاوقت مقرر ہے، ہوسکتا ہے وہ ویسے ہی دنیا سے چلے جاتے مگر اب جس طرح وہ گئے ہیں خدا کرے ایسا کسی دشمن کے ساتھ بھی نہ ہو۔
اداکارہ نے کہا کہ سب کہتے ہیں انکی غلطیاں ہیں مگر سوشل میڈیا نے ان کی غلطیوں کو اجاگر کیا، میں سمجھتی ہوں سوشل میڈیا ان بلاؤں میں سے ایک ہے جن کا قرآن کریم میں ذکر ہے، سوشل میڈیا لوگوں کی لائف برباد کرتا ہے۔قبر کشائی سےمتعلق بات کرتے ہوئے بشریٰ انصاری نے کہا کہ خدارا اسے اب بخش دیں، ایک عام شہری نے صرف شہرت کیلئے پوسٹ مارٹم کی درخواست دائر کردی ہے، پہلی بات یہ کہ عامر لیاقت کو کوئی کیوں قتل کرے گا ،وہ تو پہلے ہی روز مررہے تھے، ہم سب انہیں ماررہے تھے۔
انہوں نے مزید کہا کہ میری مجسٹریٹ سے عرض ہے کہ اس عام شہری کو ایک سائیڈ کریں اور ان کے اہلخانہ اور بچوں کا مؤقف سنیں کیونکہ اس وقت سب سے زیادہ وہ ہی متاثر ہیں، ابھی تو ان کے بچوں کو بہت کچھ چیزوں کوفیس کرنا ہے لہٰذا ان پر رحم کریں۔دوسری طرف اداکارہ ریشم کا کہنا ہے کہ سپرد خاک کے بعد قبر کشائی اور پوسٹ مارٹم نامناسب عمل ہے، اللہ تعالیٰ عامر لیاقت حسین کے درجات بلند کرے۔
