13برس بعد ہالی ووڈفلم"اواتارٹو" کاٹریلرجاری
لاہور(نیاٹائم ویب ڈیسک)کیا 2009 میں ریلیز ہونے والی ہالی ووڈ فلم "اواتار" یاد ہے جس نے سب سے زیادہ کمائی کرنے کا ریکارڈ قائم کیا تھا؟اب 13 برس بعد ڈائریکٹر جیمز کیمرون کی اس فلم کےدوسرے حصے یا سیکوئل اواتار 2: دی وے آف واٹر کا پہلا ٹریلر ریلیزکردیاگیا ہے۔
یہ ٹریلر اپریل کے آخر میں ایک ایونٹ اور پھر ڈاکٹر سٹرینج ان دی ملٹی ورس آف میڈ نس کی سکریننگ کے دوران دکھایا گیا تھا۔اب اسے آن لائن بھی جاری کردیا گیا ہے اور دیکھنے سے اندازہ ہوتا ہے کہ جیمز کیمرون ایک بار پھر شائقین کو دنگ کرنے کیلئے تیار ہیں۔اواتار -ٹو کی زیادہ تر عکسبندی پانی کےنیچے ہوئی ہے۔
اواتارٹو کو 16 دسمبر 2022 کو دنیا بھر میں ریلیز کیا جائے گا جس میں سام ورتھنگٹن، زوئی سلڈانا، گیووانی ریبیس اور سیگورنی ویور ایک بار پھر ادکاری دکھائیں گے جب کہ کیٹ ونسلیٹ سمیت متعدد نئے اداکاروں کی آمد بھی ہوگی۔یاد رہے کہ لگ بھگ 10 برس تک سب سے زیادہ بزنس کرنے والی فلم کا ریکارڈ اواتار کے نام رہا تھا جو 2019 میں ایوینجرز اینڈ گیم نے توڑاتھا۔
تاہم مارچ 2021 میں اواتار کو چین میں دوبارہ ریلیز کیا گیا اور اس نے ایک مرتبہ پھر سب سے زیادہ بزنس کرنے والی فلم کا اعزاز اپنے نام کیا۔فلم کی کامیابی کے بعد جیمز کیمرون نے اس کے 5 سیکوئلز پر کام کرنے کا اعلان کیا تھا تاہم مختلف وجوہات کے باعث 13 برس بعد پہلا سیکوئل ریلیز ہونےجارہا ہے۔
ویسے مووی کی تیاری میں اتنی تاخیر حیران کن بھی نہیں کیونکہ جیمز کیمرون نے اواتار کی تیاری کا آغاز 1994 میں اس ٹائم کیا تھا جب انہوں نے اس کا 80 صفحات پر مشتمل مرکزی خیال لکھاتھا۔اس فلم کی عکسبندی 1997 میں ٹائٹینک کے بعد شروع کی جانی تھی تاہم ڈائریکٹر جس قسم کی ٹیکنالوجی کے خواہشمند تھے وہ اس وقت انہیں میسرنہیں تھی۔
یہاں تک کہ فلم میں جس خلائی لائف کو دکھایا گیا، اس کیلئے زبان بھی خود تیار کی گئی اور یہ اپنے دور کی مہنگی ترین مووی تھی، جس پر 23 کروڑ 70 لاکھ ڈالرز لگائےگئے۔اواتار ٹو کے بعد تیسرا حصہ 2024، چوتھا 2026 اور 5واں حصہ 2028 میں ریلیز کیاجانا ہے۔
