55 وارداتوں میں ملوث بچھو گینگ کا سرغنہ مارا گیا
لاہور(نیا ٹائم)برکی کے علاقے میں 55 سے زائد وارداتوں میں ریکارڈ یافتہ بچھو گینگ کے سرغنہ مدثر عرف بچھو کو اپنے ہی ساتھیوں نے گولی مار کر ہلاک کردیا۔
ایس پی کینٹ عیسیٰ سکھیرا نے بتایا کہ برکی کے علاقے میں 2 موٹر سائیکلوں پر سوار 4 ڈاکوؤں نے واردات کی۔ جس کی بروقت اطلاع ملنے پر ملزمان کی گرفتاری کیلئے کینٹ ڈویژن میں ناکہ بندی کرتے ہوئے پٹرولنگ کو بھی ہائی الرٹ کیا گیا، ڈیفنس سی ایریا میں پہنچنے پر ڈاکوؤں کی جانب سے پولیس کو دیکھتے ہی گاڑی پر فائرنگ کی گئی۔
انہوں نے کہا کہ ڈاکوؤں کی اندھا دھند فائرنگ سے ان کا اپنا ایک ساتھی جاں بحق ہوگیا۔ ہلاک ہونے والے ڈاکوچوری اور ڈکیتی کی درجنوں وارداتوں میں ملوث تھا جس نے 2017 میں نشتر کے علاقے میں مزاحمت کے دوران کانسٹیبل محمد اعظم کو بھی قتل کر دیا تھا۔
پولیس کے مطابق فرانزک ٹیموں نے شواہد اکٹھے کر کے بچھو گینگ کے سرغنہ کی لاش کو تحویل میں لے لیا جب کہ فرار ہونے والے ڈاکوؤں کی گرفتاری کے لیے چھاپے بھی مارے جا رہے ہیں۔
