مانیٹری پالیسی میٹنگ ، شرح سود برقرار رکھنے کا فیصلہ
کراچی ( نیا ٹائم ) سٹیٹ بینک آف پاکستان نے مانیٹری پالیسی میٹنگ میں آئندہ دو ماہ کے لیے شرح سود 9 اعشاریہ 75 فیصد پر برقرار رکھنے کا فیصلہ کیا ہے ۔
گورنر سٹیٹ بینک آف پاکستان رضا باقر نے کراچی میں مانیٹری پالیسی میٹنگ کے بعد پریس کانفرنس کرتے ہوئے کہا کہ پالیسی ریٹ کو موجودہ سطح پر برقرار رکھا جائے گا ۔ آئندہ دو ماہ کے لیے شرح سود 9 اعشاریہ 75 فیصد پر برقرار رکھی جائے گی ۔
گورنر سٹیٹ بینک نے کہا گزشتہ دو ماہ کے دوران مہنگائی کی شرح کم ہوئی ۔ نومبر اور دسمبر میں مہنگائی میں اضافہ نہیں ہوا اور وہ مستحکم رہی ۔ انہوں نے کہا کہ نومبر کے دوران قیمتوں میں 3 فیصد اضافہ ہوا جبکہ نومبر کے مقابلے میں دسمبر میں مہنگائی کی شدت کم رہی ۔ تجارتی خسارے میں بھی استحکام آ رہا ہے ۔ انہوں نے کہا طلب میں اضافہ ہو رہا ہے ۔ معاشی اشاریوں میں بھی تبدیلی کی رفتار متوازن ہوئی ، جبکہ افراط زر کی شرح 12.3 فیصد تک رہی ۔
گورنر سٹیٹ بینک نے مزید کہا پاکستان کی گروتھ مستحکم رہی ہے ۔ منی بجٹ سے ہمارا مالی خسارہ مزید کم ہو گا ۔ ماہانہ بنیادوں پر مہنگای کی رفتار میں کمی آئے گی ۔ انہوں نے پٹرولیم مصنوعات کی قیمتوں پر بات کرتے ہوئے کہا کہ ان کی قیمتیں کنٹرول کرنا ہمارے ہاتھ میں نہیں ہے ۔
