سکھوں کو نشانہ بنانے کی سازش کا راز فاش
دہلی(نیا ٹائم ویب ڈیسک) بین الاقوامی ادارے نے سکھوں کو نشانہ بنانے والے نیٹ ورک کو بے نقاب کردیا اورانکشاف کیا کہ سوشل میڈیاپر سکھوں کے جعلی اکاؤنٹس کے ذریعے تقسیم کا نظریہ تیزی سے پھیلایا جارہا تھا۔
تفصیلات کے مطابق بھارت میں سوشل میڈیا کے ذریعے سکھوں کو نشانہ بنانے کی سازش کا بھانڈا پھوڑدیا گیا ہے ، بین الاقوامی ادارے کی جانب سے سکھوں کو نشانہ بنانے والے نیٹ ورک کو بے نقاب کر دیا گیا ہے۔سینٹر فار انفارمیشن ریزیلئنس نے رپورٹ میں بتایا ہے کہ بھارتی نیٹ ورک کی طرف سے سوشل میڈیا پر سکھوں کے جعلی اکاؤنٹس بنائے گئے ،جس کے بعد سکھوں کی آزادی کی مہم کو روندنے کیلئے ان کے بیانیے میں پھوٹ ڈالنے کی کوشش بھی کی گئی۔
نیٹ ورک کا عین مقصد صرف سکھوں کی آزادی،اقدارکے تاثرات تبدیل کرنا تھا، اب تک80 ایسے اکاؤنٹس منظرِعام پرآئے ہیں جن کے ذریعے سکھوں کے حقوق پامال کرنے اور ہندو قوم پرست نظریہ تیزی سے پروان چڑھوایا گیا ہے۔
بی بی سی کے مطابق اس نیٹ ورک کی جانب سے جعلی اکاؤنٹس پر پنجابی اداکاروں اور شخصیات کی تصاویر کو استعمال کیاگیا تھا۔
رپورٹ میں بتایا گیا کہ بھارتی نیٹ ورک کے 80سے زائدجعلی اکاؤنٹس کو بندکردیا گیا ہے ، جو ٹوئٹر، فیس بک اور انسٹا گرام پر بنائے گئے تھے،بھارتی حکومت کا ایجنڈا پھیلانے کیلئے سوشل میڈیا کا استعمال کیا گیا ہے۔
